Njoftim për regjistrimin e fëmijëve në çerdhe

Jun 3, 2025 | Njoftime

Njoftohen të gjithë të interesuarit që regjistrimi i fëmijëve në çerdhe dhe kopshte publike në Bashkinë Fier ka nisur më datë 02.06.2025.

Regjistrimi bëhet në mënyrë unifikuar për të gjitha institucionet publike në Bashkinë Fier.

Dokumentacioni i nevojshëm për regjistrim:

• Vërtetim banimi, ku të specifikohet qartë Njësia Administrative, Rajoni dhe Lagjja.

• Lista e vaksinave të fëmijës nga qendra shëndetësore përkatëse.

• Certifikatë familjare.

Dokumentacioni dorëzohet në zyrën me një ndalesë pranë Bashkisë Fier.

Afati për dorëzimin e dokumentacionit është deri më 30.06.2025.

THIRRJE PUBLIKE PËR PROJEKT-PROPOZIME

Jun 2, 2025 | Njoftime

THIRRJE PUBLIKE PËR PROJEKT-PROPOZIME

Për organizimin dhe realizimin e edicionit të 7-të të aktivitetit kulturor “Festa e Grurit”.
Afati i aplikimit: 2 – 6 Qershor 2025

Në zbatim të:

• Ligjit nr. 139/2015 “Për vetëqeverisjen vendore”, neni 25 mbi funksionet e bashkive në fushën e kulturës dhe turizmit;
• Ligjit nr. 10352, datë 18.11.2010 “Për Artin dhe Kulturën” dhe ndryshimeve të miratuara me Ligjin Nr. 25/2014;
• VKB nr. 139, datë 23.12.2024 “Për miratimin e Buxhetit të Bashkisë për vitin 2025”;
• Vendimit të Këshillit Artistik nr. 302, prot., datë 08.05.2025, mbi kalendarin artistik dhe kulturor për periudhën Qershor – Gusht 2025.

Bashkia Fier, përmes Drejtorisë së Artit, Kulturës, Turizmit dhe Promovimit, shpall thirrjen për projekt-propozime nga shoqata të fushës së artit, kulturës dhe trashëgimisë për realizimin e edicionit të 7-të të “Festa e Grurit”, një nga eventet më përfaqësuese të identitetit myzeqar dhe promovimit të trashëgimisë kulturore të rajonit.

PËRSHKRIMI I PROJEKTIT

“Festa e Grurit” është një event simbolik që sjell në qendër të vëmendjes identitetin bujqësor dhe kulturor të trevës së Myzeqesë, një zonë që njihet historikisht si “hambari i bukës” në Shqipëri. Aktiviteti zhvillohet në një moment të rëndësishëm të kalendarit bujqësor, në kulmin e korrjes së grurit dhe shndërrohet në një festë që i kushtohet tokës, mundit të fermerëve dhe lidhjes së ngushtë mes njeriut dhe natyrës.

Kjo festë është një reflektim i zakoneve dhe vlerave tradicionale që i kanë rezistuar kohës, e cila sjell së bashku një mozaik eventesh kulturore: këngë dhe valle popullore, gatime tradicionale, artizanat i zonës, veshje tradicionale, si dhe elemente moderne si skena muzikore dhe aktivitetet interaktive për vizitorë të grupmoshave të ndryshme.

Ky edicion i vitit 2025 ka për synim:

• Të rikonfirmojë identitetin kulturor të zonës së Myzeqesë përmes një programi festiv të gjerë dhe të strukturuar;
• Të krijojë ura komunikimi mes brezave duke ruajtur trashëgiminë dhe njëkohësisht duke sjellë elementë të rinj interpretimi;
• Të gjenerojë impakt të dukshëm në zhvillimin e turizmit vendas dhe rajonal, duke pozicionuar Fierin si një destinacion kulturor dhe festiv në nivel kombëtar;
• Të fuqizojë pjesëmarrjen e komunitetit lokal dhe bashkëpunimin me artizanë, prodhues dhe nisma rinore që kontribuojnë në pasurimin e përmbajtjes së eventit.

Eventi do të zhvillohet në një sipërfaqe prej rreth 16 hektarësh në afërsi të Parkut Arkeologjik të Apolonisë, me një planifikim logjistik dhe artistik që parashikon akomodimin e mbi 2500 vizitorëve, një skenografi të kuruar me elemente natyrore, dekore të frymëzuara nga simbolika e grurit dhe një qasje kreative që e bën këtë festë unike në llojin e saj.

ELEMENTET KRYESORE TË AKTIVITETIT

1. Paradat
   • Parada e vajzave me veshje të stilizuara me grurë;
   • Parada e autokombajnave dhe mjeteve bujqësore;
   • Parada e fermerëve vendas dhe ekspozimi i mjeteve të prodhimit bujqësor.
2. Ritet dhe Simbolet
   • Rituali i bekimit të grurit;
   • Performanca me hedhje në erë të kallinjve nga kombajnat si simbol i bollëkut dhe vazhdimësisë.
3. Panaire
   • Panairi i “bibës në saç”;
   • Panairi i bukës tradicionale dhe gatimeve me bazë gruri;
   • Stenda me produkte lokale agro-ushqimore dhe artizanale.
4. Dekor Festiv dhe Identitet Vizual
   • Hapësira do të dekorohet me kashtë, dru dhe kallama;
   • Tenda të personalizuara në stil rural myzeqar;
   • Branding dhe logim festiv i personalizuar për “Festa e Grurit 2025”.
5. Programi Artistik & Muzikor
   • Performanca nga Ansambli “Myzeqeja”;
   • Koncerte me pjesëmarrjen e artistëve të njohur: Aurela Gaçe, Juliana Pasha, Klajdi Haruni & Friends, Mariglen Hazizaj dhe të tjerë.
   • Moderatorë: Gazmend Paja & djemtë e Portokallisë.
6. Dokumentimi dhe Promovimi Mediatik
   • Fotograf dhe videograf profesionist për krijimin e materialeve promovuese;
   • Përfshirje të mediave lokale, rrjeteve sociale dhe influencuesve për rritjen e shtrirjes publike.

KRITERET PËR APLIKIM

Thirrja është e hapur vetëm për Shoqata (OJF) që plotësojnë këto kushte:

1. Subjektet duhet të jenë shoqata që operojnë në fushën e artit dhe kulturës
2. Projekti duhet të përmbushë kriteret cilësore, kreative dhe menaxheriale në dokumentacionin e dorëzuar.
3. Subjektet të jenë sipërmarrës të eventeve artistike dhe promovuese, të traditës, ndër më të mëdhatë në vend, me ndjekshmëri mbi 5000 vetë në një ditë/natë dhe kanë kontrata me bashkitë e vendit dhe ministritë për këto evente.
4. Shoqata, zërat e: krijimtarisë, Marketing & Communication (Fushata social, kreativa, postime), duhet t’i kryejë me burimet njerëzore të veta.
5. Shoqata duhet të të sjellë koncept idenë e festës dhe planimetrisë së saj, logimin e festës, design e skenës, posterat e aktiviteteve, të artistëve, të cilat duhet të jenë kreative dhe unike në përshtatje me natyrën e festës.

DOKUMENTACIONI I NEVOJSHËM

Aplikimi duhet të përmbajë:

1. Formularin e Aplikimit (i plotësuar dhe firmosur);
2. Kopje të Statutit dhe Vendimit të Gjykatës për themelimin e OJF-së;
3. CV e detajuar e Aplikantit
4. Dokumentin e regjistrimit në QKB dhe NIPT aktiv;
5. Vërtetim të IBAN-it të llogarisë bankare në Lekë (i lëshuar nga banka, me vulë dhe firmë);
6. Preventiv të përgjithshëm dhe të detajuar të projektit;
7. Deklaratë për përdorimin e të drejtës së autorit dhe mospërfitimin personal nga të ardhurat.

Në bazë të:

• VKM Nr. 1173, datë 06. 11. 2009 “Për përcaktimin e rregullave për organizimin e ngjarjeve kulturore, artistike dhe sociale nga organet e qeverisjes qendrore dhe institucionet e tjera publike, të pavarura”,
• Vendimi i Këshillit Bashkiak, nr. 11, datë 30. 01. 2023 “Për miratimin e rregullores së financimit të projekteve artistike – kulturore – sportive dhe promovuese pranë DAK-së së Bashkisë Fier”.

AFATI I APLIKIMIT

Nga data 2 – 6 Qershor 2025

Të gjitha dokumentet duhet të dorëzohen fizikisht në:
Zyra e Protokollit të Drejtorisë së Artit, Kulturës, Turizmit dhe Promovimit – Bashkia Fier
Dokumentet duhet të jenë të firmosura dhe, në rastin e personave juridikë, edhe të vulosura.

Buxheti i kësaj feste prej 4,999.999 ( me TVSH) do të mbulohet nga Bashkia Fier dhe përcaktohet në përputhje me vendimin e Këshillit Artistik nr. 302, datë 08. 05. 2025 “Miratimi i kalendarit të aktiviteteve artistike dhe kulturore të DAKTP-së së Bashkisë Fier nga Këshilli Artistik i Bashkisë për periudhën Qershor – Gusht 2025 për kalendarin artistik 2025”. Fondet do të shpërndahen vetëm për projektet që përmbushin kriteret cilësore, kreative dhe menaxheriale sipas dokumentacionit të dorëzuar.

Bashkia Fier – Rruga “Jani Bakalli”, lagjja “1 Maji”, Fier

U realizua mbledhja e Këshillit Bashkiak Fier. Dt. 29.05.2025

May 30, 2025 | Njoftime

U realizua mbledhja e Këshillit Bashkiak Fier. Dt. 29.05.2025, ku u miratuan të gjitha pikat e rendit të ditës.

Njoftim për Dëgjesë Publike

May 27, 2025 | Njoftime

Kanë nisur dëgjesat publike për prezantimin e materialeve lidhur me sinjalistikën rrugore vertikale dhe horizontale, si edhe me sinjalet dhe pajisjet shtesë për rrugët.

Të gjitha palët e interesuara dhe grupet përkatëse ftohen të marrin pjesë në këto dëgjesa.

Çdo sugjerim, propozim apo mendim i dërguar në adresën zyrtare të emailit info@bashkiafier.gov.al Neritan.Bocova@bashkia.gov.al ose i lënë në formë komenti është i mirëpritur dhe do të merret në konsideratë nga komisioni përkatës, me qëllim garantimin e një procesi sa më transparent, gjithëpërfshirës dhe në funksion të interesit të komunitetit.

Njoftim për dëgjesë publike

May 21, 2025 | Njoftime

Njoftim për dëgjesë publike ( Kliko këtu për dokumentin)